ភ្នំពេញ៖ លោក ខាត់ ចំរើន តារាកំប្លែង ដែលត្រូវជាប្អូនប្រុសបង្កើតអ្នកនាង ខាត់ សុឃីម បានទទួលមរណភាពហើយនៅព្រឹកថ្ងៃទី២០ ខែវិច្ឆិកា ឆ្នាំ២០២២ ក្នុងអាយុ ៤០ឆ្នាំ។
អ្នកនាង ខាត់ សុឃីម ធ្លាប់បានបញ្ជាក់ថា លោក ខាត់ ចំរើន កន្លងមកធ្លាប់មានជំងឺក្រិនថ្លើម និងខូចក្រលៀនធ្ងន់ធ្ងរ ដោយមុនមួយថ្ងៃដែលលោក ខាត់ ចំរើន បានមរណភាពនោះ អ្នកនាង ខាត់ ចំរើន បានប្រកាសនៅក្នុងគណនីហ្វេសប៊ុករបស់ខ្លួនថា ត្រូវការឈាមចំនួន ៤ប្លោកជាបន្ទាន់ដើម្បីសង្រ្គោះជីវិតប្អូនប្រុស។
ក្រោយមរណភាពប្អូនប្រុស អ្នកនាង ខាត់ សុឃីម បានប្តូររូប Profile ហ្វេសប៊ុកកាន់ទុក្ខដោយរៀបរាប់ដូច្នេះថា៖ «សូមប្អូនទៅកាន់ឋានសុខ ជាតិក្រោយសូមអោយអាយុវែង ទៅចុះកុំគិតពីប្រពន្ធកូន បងប្អូនមើលថែរហើយ បងជួយអោយកូនៗរបស់ឯងរៀនសូត្រចប់ចុង ចប់ដើម។ ពុកអើយអាចំរើនវាទៅមើលថែពុកហើយ»។
បច្ចុប្បន្នសពលោក ខាត់ ចំរើន ត្រូវបានក្រុមសាច់ញាតិធ្វើបុណ្យនៅផ្សាត្រពាំងព្រាយ សង្កាត់ពញាពន់ ខណ្ឌព្រែកព្នៅ ជិតភ្នំបាសិទ្ធ៕
